(Manila, Nobyembre 4, 2025) — Ang gobyerno sa Pilipinas, mga kompanya sa pagmina og nickel, ug mga tiggamit sa nickel, lakip na ang mga kompanya sa electric vehicle (EV) ug baterya, kinahanglang mohimo dayon og mga lakang aron mapugngan ug masolbad ang pagkadaut sa kinaiyahan ug mga paglapas sa tawhanong katungod nga resulta sa pagmina og nickel, matod sa Climate Rights International sa usa ka bag-ong taho at video nga gipagawas karon. Ang Pilipinas mao ang ikaduhang kinadak-ang prodyuser sa nickel ug ang nanguna sa kalibotan sa pag-eksport sa hilaw nga nickel ore, usa ka mineral nga gigamit sa mga baterya alang sa mga de-koryenteng sakyanan ug power storage.

Sa 125-panid nga taho, “Guba nga mga Saad: Ang Pagmina sa Nickel sa Pilipinas Nagpagrabe sa Paglapas sa mga Katungod ug Nagdugang sa mga Problema sa Klima,” ang Climate Rights International nag-interbyu sa 57 ka residente ug trabahante nga nagpuyo duol sa mga minahan sa nickel sa Dinagat Island ug Surigao del Sur sa Caraga Region sa Mindanao, ang sentro sa industriya sa pagmina sa Pilipinas. Ang Rehiyon sa Caraga adunay 23 ka naglihok nga minahan sa nickel, pinakadaghan sa tanang rehiyon sa Pilipinas. Ang mga miyembro sa komunidad nagtaho sa dugang nga nga mga risgo sa krisis sa klima nga nalambigit sa pagmina; ang pagguba sa panginabuhian sa pagpangisda ug pagpanguma; grabe nga polusyon sa kinaiyahan nga makadaut sa tubig nga mainom ug sa panglawas; dugang nga mga kaso sa kawalay kasiguruhan sa pagkaon; bag-ong kalisdanan sa edukasyon; kakulang sa pagpanubag sa mga kadaot; ug mga pag-atake, pagpamatay, kriminalisasyon, ug pagpanghadlok sa mga kritiko, lakip na ang mga tigpanalipod sa kinaiyahan ug tawhanong katungod.

Ang Climate Rights International nagtaho na kaniadto bahin sa susamang mga paglapas sa tawhanong katungod, kadaut sa kinaiyahan, ug klima nga nalambigit sa pagmina ug pagproseso sa nickel sa Indonesia. Ang mga multinasyonal nga kompanya nga nakabenepisyo gikan sa supply chain sa nickel gamay ra ang gihimo aron sulbaron ang dokumentado nga mga kadaot ug pag-abuso.

“Importante ang nickel alang sa pagbalhin ngadto sa renewable energy, apan sa Pilipinas ang pagmina og nickel nagdaot sa panginabuhian sa pagpangisda ug pagpanguma, nagmugna og kawalay kasigurohan sa pagkaon, ug nagpagrabe sa makahilo nga polusyon sa tubig nga mainom,” matod ni Krista Shennum, researcher sa Climate Rights International. Ang mga tigpanalipod sa kinaiyahan ug tawhanong katungod nag-atubang og mga pag-atake, kriminalisasyon, ug bisan kamatayon tungod sa ilang pagbatok. Ang gobyerno sa Pilipinas kinahanglan nga unahon ang mga katungod ug kaayohan sa mga komunidad nga nag-atubang sa pagmina—sila nga walay kalabotan sa krisis sa klima—pinaagi sa pagpanubag sa mga kompanya sa mga pag-abuso ug kadaot sa kinaiyahan.”

Pagkaguba sa Kinaiyahan ug Paglapas sa Katungod sa Tawo

Ang pagmina og nickel dali nga makaapekto sa mga komunidad ug sa  klima, lakip na ang grabeng mga panghitabo sa panahon. Ang pagmina og nickel nagpalihok sa pagka-upaw sa kalasangan ug pagkawala sa mga species nga naghatag og kalig-on sa klima, sama sa kalasangan sa yuta ug kalasangan sa mangrove. Kon mahitabo ang pagka-upaw sa kalasangan, ang carbon nga natipig sa mga tanom ug sa yuta mahimong buhian ngadto sa atmospera – ang  usa ka carbon sink mahimo na hinuon nga tinubdan sa emisyon. Gihulagway sa mga residente sa Tubajon sa Dinagat Island sa Mindanao kon giunsa sa pagkawala sa mga kalasangan ug mangrove tungod sa pagmina, ug polusyon nga may kalabotan sa pagmina, ang ilang mga komunidad nahimong mas bulnerable sa storm surges o daluyong, kusog nga hangin, ug baha panahon sa grabe nga mga panghitabo sa panahon sama sa makadaot nga Super Typhoon Odette niadtong 2021.

Alang sa mga komunidad nga dugay nang nagsuporta sa ilang kaugalingon pinaagi sa pagpangisda, ang polusyon gikan sa pagmina og nickel nagpagrabe sa hulga sa ilang pagkinabuhi. Sa Dinagat Island ug Surigao del Sur, ang mga mangingisda nga giinterbyu sa Climate Rights International naghulagway kon sa unsang paagi ang polusyon sa tubig gikan sa mga lugar sa pagmina nakadaot sa pangisdaan ug nagpalisod  sa mga tawo sa pagpadayon sa pagpangisda.

Sa tibuok rehiyon, gihulagway sa mga mag-uuma kon ngano, tungod sa pagmina sa nickel, mas lisud ang pagpanguma, ug sa pipila ka kaso imposible gyud, tungod sa pagkawala sa ilang yuta sa pagpanguma, kanunay nga pagbaha sa mga uma gikan sa mga suba nga gibabagan sa pagmina, ug polusyon sa abog ug tubig gikan sa duol nga mga minahan. Ang bugas, ang labing importante nga pagkaon sa rehiyon, labi na nga apektado tungod kay kini gitanom sa mga lugar nga ubos nga yuta nga dali ma-baha ug ma-sedimento.

Ang dili maayo nga mga pamaagi sa pagmina sa Pilipinas nagpalisod samot sa katungod sa pagkaon. Ang polusyon gikan sa pagmina og nickel ug ang miresulta nga negatibong epekto sa panginabuhi nagpalisod sa daghang pamilya sa pagpakaon sa ilang kaugalingon. Sumala ni Analiza, usa ka 46-anyos nga inahan sa upat ka anak gikan sa Tubajon, Dinagat Island, “Lisod na karon pakan-on ang akong pamilya. Kanunay ra mi gutom.

Ang pagmina og nickel sa Rehiyon sa Caraga naghugaw usab sa importante nga mga tinubdan sa tubig nga gisaligan sa mga residente alang sa ilang mainom nga tubig. Gihulagway sa mga residente sa Isla sa Dinagat kon giunsa sa pagkahugawan sa siltasyon ug runoff gikan sa mga operasyon sa pagmina ang ilang tubig nga mainom. Ang mga residente nga nagpuyo duol sa mga minahan sa nickel sa Dinagat Island ug Surigao del Sur nagsulti sa Climate Rights International nga nabalaka sila nga ang bag-o lang naugmad nga mga problema sa panglawas, lakip na ang mga sakit sa respiratoryo ug panit, may kalabotan sa polusyon gikan sa duol nga mga minahan.

Ang Pilipinas mao ang labing delikado nga nasod sa Asya alang sa usa ka tigpanalipod sa yuta ug sa kinaiyahan. Daghang tawo nga giinterbyu sa Climate Rights International ang nagtaho nga nakaila sila sa mga indibidwal nga ilang gituohan nga gipatay tungod sa ilang paglihok batok sa pagmina o kinsa mismo ang nakasinati og pag-atake, pagpanghasi, o pagpanghadlok. Ang ubang mga indibidwal sa Rehiyon sa Caraga ug sa tibuok Pilipinas nga nakigbatok sa mga kompanya sa pagmina nakasinati og Strategic Lawsuits Against Public Participation (SLAPPs) nga ilang gituohan nga gituyo aron pagpahilom sa ilang aktibismo.

Bisan pa man nga daghang kumpanya na ang nadato sa pagmina sa nickel, ang pipila ka residente sa Isla sa Dinagat nagtaho nga wala sila makadawat og igong bayad alang sa paggamit sa ilang yuta, pagguba sa ilang mga tanom, o paggamit sa ilang mga balay ug uban pang mga istruktura.

“Ang mga tawo nga nagpuyo sa mga komunidad sa pagmina nag-atubang og dakong kadaot gikan sa gamhanang mga kompanya nga naglihok nga halos walay silot,” matod ni Shennum. Isip usa sa mga nasod nga labing naapektuhan sa krisis sa klima, ang gobyerno sa Pilipinas kinahanglan magpunting sa pagpanubag sa mga kompanya ug pagsiguro nga ang industriya sa nickel dili makapasamot sa epekto sa climate change sa lokal nga mga komunidad.

Responsibilidad sa Gobyerno ug Korporasyon

Ang kinatibuk-ang kakulang sa transparency sa daghang kompanya sa pagmina nakaapekto sa katakos sa lokal nga mga gobyerno ug komunidad sa aktibong pag-apil sa pag-apruba sa mga proyekto sa pagmina o pag-monitor sa mga epekto sa pagmina. Bisan pa sa padayon nga mga reklamo gikan sa lokal nga mga komunidad, kadtong direkta nga naapektuhan nag-atubang og kakulang sa pagpanubag ug mga solusyon alang sa mga kadaot nga ilang naangkon.

Ang Climate Rights International nanawagan sa gobyerno sa Pilipinas, lakip na ang Department of Environment and Natural Resources ug ang Mines and Geosciences Bureau, nga hingpit nga ipatuman ug palig-onon ang mga balaod ug regulasyon aron maminusan ang epekto sa pagmina sa nickel sa mga komunidad. Ang gobyerno kinahanglan nga dinalian nga mohunong sa pagtugot sa bag-ong mga minahan hangtod nga ang industriya makatuman sa nasudnon ug internasyonal nga mga sumbanan sa kalikopan, lakip na sa pagdumala sa basura sa minahan.

Ang kadaot sa lokal nga mga komunidad ug sa kinaiyahan nahitabo lang tungod  sa mga lakang sa mga indibidwal ug nagkahiusang mga proyekto sa pagmina og nickel, matod sa Climate Rights International. Daghang kompanya sa pagmina og nickel sa Rehiyon sa Caraga adunay kalambigitan sa gamhanang mga tawo sa Pilipinas, lakip na ang aktibo ug kanhi mga politiko, mga pamilya nga konektado sa politika, ug adunahan nga mga negosyante. Ang mga kompanya sa nickel kinahanglan mohimo dayon og mga lakang aron masulbad ang polusyon sa tubig ug hangin nga gipagrabe sa ilang mga operasyon, ug matarong nga ilabay ang basura sa minahan aron maminusan ang polusyon sa kinaiyahan.

Ang mga kompanya sa de-koryenteng sakyanan ug baterya nga direkta o dili direkta nga nagkuha og nickel gikan sa Pilipinas kinahanglan mogamit sa ilang impluwensya aron masiguro nga ang mga supplier mohunong ug mag-ayo sa mga paglapas sa katungod, limpyohan ang polusyon sa tubig ug hangin, ug panalipdan ang katungod sa mga tigdepensa sa kinaiyahan ug tawhanong katungod, matod sa Climate Rights International. Ang mga kompanya sa de-koryenteng sakyanan kinahanglan usab nga dugangan ang transparency pinaagi sa paghatag og impormasyon sa publiko bahin sa tanang kompanya sa ilang mga supply chain sa transition mineral.

“Ang mga kompanya sa de-koryenteng sakyanan ug baterya adunay talagsaong gahum sa paghangyo nga limpyohan sa industriya sa pagmina ang ilang pamatasan,” matod ni Shennum. Ang ilang mga kustomer mahunahunaon sa kinaiyahan ug magdesisyon sa pagpalit gikan sa mga kompanya nga adunay labing limpyo nga rekord. Kon gusto ang mga kompanya sa EV nga magpahimutang sa ilang kaugalingon isip mga lider sa kalibotan sa pagpakig-away batok sa climate change, kinahanglan nilang mandohan ang mga kompanya sa pagmina nga naa sa ilang supply chain mga motahod sa mga katungod sa mga komunidad ug tapuson ang mga ginbuhaton nga makadaot sa kinaiyahan.”